ఏ మాత్రం సమయం చిక్కినా వార్తాపత్రికలు తప్పకుండా చదివే నేను 5th Pillar గురించి చదివాను. లంచం కోరే వారికి వీరు ముద్రించిన ‘నేను లంచం తీసుకోను, ఇవ్వడానికి ఇష్టపడను ‘ అనే సున్నా నోటు గురించి, విద్యార్థుల తోడ్పాటు, ప్రజల్లో కలిగిన స్పందన, అన్నీ చదివాను. ఏ మాత్రం ఆశ కలగలేదు. చాలా నిర్లిప్తంగా, యథాలాపంగానే చదివాను.
ఈ ప్రయత్నం విజయం సాధించిన ఉదాహరణలు చదివినా కూడా నమ్మకం లేదు. ఏదో భారత క్రికెట్ జట్టు ఫ్లూక్ గా గెలిచినట్టు.
వీరి గురించే చైతన్య గ్రూపులో ఓ మెయిల్ పోస్ట్ చేసాడు ఈ మధ్యనే. దానికి కూడా నేను ఓ నిరాశాజనకమైన అభిప్రాయం వ్రాసాను.
అనుకోకుండా మొన్న సోమవారం, 17 వ తేదీన, విజయ్ గారు మెయిల్ పంపారు. AIMS India ఫౌండర్ ను, హైదరాబాదులో ఉన్నాను. నీతో మాట్లాడాలనుకుంటున్నాను ఫోన్ నంబరు మెయిల్ చెయ్యి, లేదా ఫలానా నంబరుకి మెయిల్ చెయ్యి అని.
చూసాను ఆ వెబ్ సైటుని. అవినీతి తో యుద్ధం అంటే నేనేమి చేయగలను అనుకున్నాను. ఇక మాట్లాడేందుకు ఏముంది అని కూడా అనుకున్నాను. కాకపోతే అందరూ కలిసి పని చేయాలి, అందరూ ఒకరికొకరు తోడ్పడాలి, ఇలాంటివి చూసి, విద్య, ఆరోగ్యం వీటిలో కూడా కృషి చేస్తున్నందున దానికి సంబంధించి మాట్లాడచ్చులే అనుకున్నా.
ఆయనేమో 5thpillar.org చూడమన్నారు. వార్తలు, విజయగాథలు చదవమన్నారు. చదివాను. నిజమేనా, నిజంగానేనా అనిపించింది.
తీరా విందును కదా, అవును నిజమే కదా అనిపించింది. అవినీతిని ఆవేశంతో కన్నా, ఆలోచనతో ఎదుర్కోవాలి, అసలు ముందు ఎదిరించాలి అనే దిశగా మన దృక్పథం మారాలి, సమాజపరంగా అలాంటి ఆవశ్యకత ఎంతైనా ఉంది అనిపించింది.
మొత్తానికి ఆ సమావేశం అవినీతి ఎప్పటికైనా సమసిపోతుందనే ఆశ నాలో కలిగించిందని మాత్రం చెప్పగలను.
: నందు ఉంచబడ్డది; About Me
